Predición xeral para Galicia

Galicia quedará durante esta xornada na influencia das altas presións, aínda que a presenza dunha baixa localizada ao norte de Francia introducirá aire frío. Deste xeito o ceo estará en xeral pouco anubrado ou despexado, con algún intervalo de nubes baixas a primeiras horas no terzo norte; xa pola noite as nubes aumentarán en xeral e na costa de Lugo rexistraranse algúns chuvascos. As temperaturas mínimas este día non terán cambios, polo que a madrugada será novamente fría e as máximas tamén descenderán moderadamente, polo que a sensación térmica de frío manterase durante toda a xornada na meirande parte da Comunidade. Os ventos soprarán de compoñente norte, frouxos nas primeiras horas, con tendencia a aumentar ata acadar refachos fortes a partir do mediodía nas Rías Baixas.